နှလုံးကျန်းမာရေးအတွက် လုပ်သင့်တဲ့ လေ့ကျင့်ခန်း (၃) မျိုး
ကိုယ်လက်လေ့ကျင့်ခန်းတွေ လုပ်တာက နှလုံးအပါအဝင် ခန္ဓာကိုယ်တစ်ခုလုံး ကျန်းမာသွက်လက်ဖို့ အထောက်အကူ ဖြစ်ပါတယ်။
လေ့ကျင့်ခန်း ပုံမှန်လုပ်ရင်…
- နှလုံးကြွက်သားတွေ သန်မာပြီး နှလုံးညှစ်အားကောင်းလာတာ
- သွေးကြောထဲက ကိုလက်စထရောတွေကို ဖယ်ရှားပေးပြီး သွေးကြောတွေ မပျက်စီးအောင် ကာကွယ်ပေးတာ
- သွေးထဲက သကြားဓာတ်နဲ့ သွေးဖိအား မတက်အောင် ထိန်းညှိပေးတာ
- ကိုယ်အလေးချိန် မတက်ဘဲ ကျစ်လစ်သွယ်လျစေတာ စတဲ့ ကောင်းကျိုးတွေ ခံစားရပါလိမ့်မယ်။
လေ့ကျင့်ခန်းအမျိုးအစားတွေ အများကြီး ရှိတဲ့အထဲက နှလုံးကျန်းမာရေးအတွက် ပုံမှန်လုပ်သင့်တဲ့ လေ့ကျင့်ခန်း (၃) မျိုး အကြောင်းကို ပြောပြချင်ပါတယ်။
(၁) အေရိုးဗစ် လေ့ကျင့်ခန်း
အေရိုးဗစ်လေ့ကျင့်ခန်းတွေက သွေးလှည့်ပတ်မှုကို ကောင်းစေပြီး နှလုံးခုန်နှုန်းနဲ့ သွေးဖိအားကို လျော့ကျစေပါတယ်။ နှလုံးညှစ်အားကိုလည်း ကောင်းစေပြီး ခန္ဓာကိုယ်တစ်ခုလုံးကို သွေးနဲ့ အောက်ဆီဂျင်တွေ ပိုမိုရောက်ရှိအောင် ပို့ဆောင်ပေးပါတယ်။ သွေးတွင်းသကြားဓာတ်ကို ထိန်းညှိပေးလို့ ဆီးချိုရောဂါ မဖြစ်အောင် ကာကွယ်ပေးသလို ဆီးချိုရောဂါရှိပြီးသား သူတွေမှာလည်း နောက်ဆက်တွဲဆိုးကျိုးတွေ မဖြစ်အောင် ကာကွယ်ပေးပါတယ်။
အေရိုးဗစ်လေ့ကျင့်ခန်းကို တစ်နေ့ကို နာရီဝက်ခန့်နဲ့ တစ်ပတ်ကို ၅ ရက်ခန့် လုပ်ရင် လုံလောက်ပါတယ်။
(၂) အကြောလျှော့ လေ့ကျင့်ခန်း
အကြောလျှော့လေ့ကျင့်ခန်းတွေက ခန္ဓာကိုယ်ကို ပျော့ပြောင်းစေပြီး ဟန်ချက်ညီစေပါတယ်။ နှလုံးကို တိုက်ရိုက်သက်ရောက်မှု မရှိပေမယ့် ခန္ဓာကိုယ်က ကြွက်သားတွေ ပြေလျော့စေပြီး အဆစ်အမြစ်တွေနာတာ၊ ကြွက်သားတွေနာတာနဲ့ ကြွက်တက်တာတွေ မဖြစ်အောင် ကာကွယ်ပေးပါတယ်။ တခြားလေ့ကျင့်ခန်းတွေ မလုပ်ခင်နဲ့ လုပ်ပြီးချိန်မှာ အကြောလျှော့လေ့ကျင့်ခန်းကို လုပ်တာက နာကျင်ဒဏ်ဖြစ်တာတွေ သက်သာစေသလို လေ့ကျင့်ခန်းတွေကို ပိုထိရောက်စေပါတယ်။
အကြောလျှော့လေ့ကျင့်ခန်းတွေကို နေ့စဥ်လုပ်သင့်ပါတယ်။
(၃) အလေးမ၊ တွန်းကန်ရတဲ့ လေ့ကျင့်ခန်း
အလေးမတာ၊ စက်တွေနဲ့ ကစားတာ၊ ကြိုးတွေနဲ့ ကစားတာ၊ ဒိုက်ထိုးတာ၊ Squat ထိုင်တာ၊ နံရံကို တွန်းကန်တာ စတဲ့ လေ့ကျင့်ခန်းတွေဟာ နှလုံးရဲ့ရန်သူဖြစ်တဲ့ ဗိုက်ကအဆီတွေနဲ့ ခန္ဓာကိုယ်တစ်ခုလုံးက အဆီတွေကို ကျစေပြီး ကြွက်သားတွေကို သန်မာစေပါတယ်။ သုတေသနတွေအရ အလေးမနဲ့ တွန်းကန်ရတဲ့ လေ့ကျင့်ခန်းတွေဟာ အကျိုးပြုကိုလက်စထရော HDL ပမာဏကို များစေပြီး ဆိုးကျိုးဖြစ်စေတဲ့ LDL ကိုလက်စထရောတွေကို လျော့နည်းစေပါတယ်။
ဒီလေ့ကျင့်ခန်းတွေကို တစ်ပတ်မှာ ၂ ရက်ခန့် လုပ်ပေးရင် နှလုံးအတွက် လုံလောက်ပါတယ်။
အဝလွန်နေတဲ့သူတွေ ဆိုရင်တော့ မိမိအရပ်နဲ့ ကိုက်ညီတဲ့ ကိုယ်အလေးချိန် ရောက်တဲ့ထိ နားလည်တတ်ကျွမ်းတဲ့ Trainer နဲ့ တိုင်ပင်ပြီး ဖြည်းဖြည်းချင်း ချသင့်ပါတယ်။
တစ်ဖက်က လေ့ကျင့်ခန်းတွေ လုပ်သလို တစ်ဖက်ကလည်း ကျန်းမာရေးနဲ့ ညီတဲ့ အသီးအရွက်၊ အသား၊ ငါး၊ ပဲအမျိုးမျိုး၊ အစေ့အဆံနဲ့ အခွံမာသီးတွေ၊ Omega 3 Fatty Acid ကြွယ်ဝတဲ့ အစားအစာတွေ စားတာ၊ ဆီကြော်တွေ၊ ရယ်ဒီမိတ်အစားအစာတွေ၊ ပြုပြင်ထားတဲ့အစားအစာတွေ (ဘီစကစ်၊ ကွက်ကီး၊ ဟမ်ဘာဂါ၊ ပီဇာစသည်)၊ တိရိစ္ဆာန်အဆီတွေ ရှောင်တာမျိုး လုပ်ပါမှ နှလုံးကျန်းမာရေး ကောင်းနိုင်ပါလိမ့်မယ်။
Healtppy က စာတွေက အတွေးအမြင်ဗဟုသုတ တစ်ခုခု ရခဲ့မယ်ဆိုရင် တခြားသူများလဲ သိအောင် share ပေး၊ mention ပေးခဲ့ကြပါဦး။
ကျန်းမာရေး ပြဿနာများကို Healtppy ၏ အထူးကုဆရာဝန်ကြီးများနှင့်ဆွေးနွေးကုသနိုင်သလို၊ ဆရာဝန်များနှင့် လွယ်ကူလွတ်လပ်စွာ Messenger (သို့မဟုတ်) Phone ကနေလည်း ဆွေးနွေးကုသမှု ရယူနိုင်ပါတယ်။
ဒေါက်တာ ယဉ်ရွှေရည်